Nokkur hópur Ullunga fór til Svíþjóðar til að taka þátt í þeirri miklu skíðagönguveislu sem tengist Vasagöngunni. Reynt var að fylgjast með árangri þeirra hér á vefnum. Nú er hópurinn kominn heim eftir frækilega för og við höfum fengið betri myndir til að skreyta færsluna. Athugið að það fást stærri myndir með því að smella á þær!
6. mars 2011
Það voru 22 Íslendingar sem hófu keppni í Vasagöngunni í morgun, þar af þrír félagsmenn í Ulli sem stóðu sig með sóma. Baldur H. Ingvarsson lauk göngunni á 6:26:28, Darri Mikaelsson gekk á 7:33:36 og Þóroddur formaður vor á 9:09:02. Við Ullungar getum því verið stoltir af frammistöðu okkar fólks í þessari miklu íþróttahátíð og óskum þeim öllum til hamingju.
Hér má sjá árangur íslenska hópsins!
4. mars 2011
Hér til hliðar er mynd af hinni vösku sveit. Myndgæðin eru e.t.v. ekki upp á það besta enda er myndin send sem myndskilaboð úr síma. Væntanlega fáum við að sjá fleiri og enn betri myndir síðar.
Hér má sjá árangurinn!
1. mars 2011
Í dag var „HalvVasan“ á dagskrá og þar áttu Ullungar góða fulltrúa sem ástæða er til að óska til hamingju með árangurinn. Ólafur Helgi Valsson gekk á 02:44:29, Haraldur Hilmarsson á 02:54:13 og Þórhallur Ásmundsson á 03:00:29.
Árangur þeirra og annarra Íslendinga, sem gengu HalvVasan, má sjá hér.
28. febrúar 2011
Tveir Ullungar gengu „opið spor“ í dag og báðir lögðu að baki sína 90 km. Darri Mikaelsson lauk göngunni á 07:06:59 og Gísli Óskarsson lauk sinni göngu á 12:04:59. Báðir mega vera stoltir af árangrinum og er þeim hér með óskað til hamingju!
Árangur þeirra og annarra Íslendinga sem gengu opið spor í gær eða í dag má sjá hér.
27. febrúar 2011
Fyrstur til að reyna sig í brautunum var Gústaf Darrason sem keppti í Ungdomsvasan, í flokki stráka 11-12 ára sem ganga 5 km. Hann varð í 61. sæti af 128 sem luku keppni í þessum flokki, gekk á 21:54 mín. Við óskum Gústaf til hamingju með glæsilegan árangur!
